Print

Print


Conclusion continuat:
 
Ma lass nos posir li discussion sur un altri plan. Lass nos admisser
por un moment con li adherentes de ILa, que li principie del n.k. es
tam valorosi que it justifica, in nor opinion, li total sacrificie
del simplicita' e regularita'. Esque noi vell alor realmen ganiar
alquo' adoptente ILa? Certmen ne, nam provante edificar un lingue
quel ilustra li vertu's del n.i., Dr. Gode sembla sat paradoxalmen
har aportat just li pruva que ti principie del n.i. (i.e.
naturalitate integral) es i'naplicabil in li practica. In facte li
naturalita' de ILa es tam poc integral que plu quam li demi' del
lingue es exactmen tam schematic quam Occidental. Alor, quo garanti
nos que ILa es realmen li "ultim parol" in li production de lingues
naturalistic? Un altri autor posse venir deman e presentar nos un
lingue ancor plu "natural". In facte, tal sistemas ja existe, a saver
NEOLATIN de Schild e INTERNACIONAL de Campos de Lima. Noi deve
aconosser que ambi autores ha successat aplicar li principie del n.i.
in maniere plu logic e plu consequent quam to es li casu in ILa. Or
Schild ha abandonat interim su NEOLATIN por subtener ILa. Pro quo? Li
grand calamita' del principie del n.i. es que on ne posse perducter
it til su ultim consequenties. Li autor de NEOLATIN devet convicter
se que il hat eat tro for in li sacrification del postulates de
facilita' e simplicita'. Il dunc aconosse implicitmen que li n.i.,
aplicat al lingues constructet, have su natural li'mites e que
regularita' es egalmen necessi. Or, qui es capabil determinar ti
li'mites? Qui va pruvar nos que li corect dosage de regularita'
(schematisme) e naturalita' es realisat plu bon in ILa quam in
Occidental?
 
Noi dunc reveni al question: qual progress e quel novum representa
ILa in comparation con li altri lingues naturalistic? Noi vide solmen
que ILa es, in essentie, un specie de idioma sudromanic fortmen
latinisat. Or si noi have un preferentie por li particularita's
lingual sudromanic, noi es infinitmen plu bon servit per Neolatin o
Internacional. Si, in contrari, noi es seductet per li latinita',
tande noi have in li bellissim Latino sine flexione un lingue quel
nequel de su imitatores ha alquande successat egalar. Del visunctu
del n.i. chascun de ti tipes de lingue have su avantages, ma
regretabilmen noi ne retrova les in li mixtura ILa.
 
In su pamflete, Berger substreca li similita' morfologic inter ILa e
Occidental por provar convicter nos que li transition a ILa vell, in
realita', imposir nos null sacrificie. Ti argument retorna se contra
il self. Nam si vermen li diferenties inter li du lingues vell esser
tam i'nsignificant, it vell esser absurd, sacrificar li resultates de
un lon-annual propaganda por recomensar li tot labor in favor de un
lingue nov quel ancor possede practicmen null litteratura didactic.
Sr. Berger sembla har comprendet ti contradition. Vice presentar nos
li pertinent e convictiv argumentes linguistic in favor de ILa queles
noi vell logicmen har expectat in su exposite, il emfasa, quam
argument capital, li garanti'e quel representa por li munde li grand
autorita' de IALA quam scientic e impartial institution
international. Quam producte del labor colectiv del stab linguistic
de IALA, li nov lingue deve, secun il, esser considerat quam li
resultate final e li apoge' del resercha interlinguistic. Or li
revelationes de un del ex-ductores del stab linguistic de IALA ha
furnit nos interte'mpor un pictura levimen diferent pri li metodes de
labor de IALA e noi save hodi'e que ILa ne es li ovre colectiv del
scientistes de IALA, ma li creation personal de un de su
colaboratores, Dr. Alexander Gode. Lass nos dir ci con omni necessi
emfase, que quam creator de un lingue international Dr. Gode jui che
nos exactmen li sam respecte quam omni altri pioneros del movement
mundlingual e que noi sin reserva aconosse omni resultates positiv
queles il ha aportat al comun edifice. Ma ti aconossentie implica de
altri la'tere que noi deve qualificar quam conscient falsification
del factes li afirmation que ILa es li producte del scientic labor de
IALA e quam altmen i'nelegant li prova voler continuar fundar li
propaganda por ILa sur un historic inexactita'.
 
[va esser continuat in part XVII]
 
Amic,
Bob, x+0~